الدنيا مو حلوه بدونـچ أه يـيمه | الشاعر امجد الزيادي

الدنيا مو حلوه بدونـچ    أه يـيمه
والله مشـتاكه لعيونچ    أه ييـمه

رحتي وكليبي انجرح   خذتي وياچ الفرح
              أه يــيــمـــه
"""""" """"""" """"""" """""""

بعدچ بعمر الورد     يالنويتي على البعد
     البيت أحسه وحشه يا يمه بغيابـچ
لبابج بعيني اصد      اتذكر جفوف الحقد
     من أجته ودفعته بلا رحمـه بابـچ
لذتي خلفه للستر.    ونبت بسمار الغدر
    الباب خشبه واستحه واصبح حجابچ
ماكو واحد كلبه رف.   بحقچ ومحد عرف
    رسموا بـكد السـمه لـوحة عذابچ

يمه لسه زغيره بعدچ    يالحنينه
يصعب عليـه اوسـدچ    يالحنينه

دهري عكبچ ما نصح    خذتي وياچ الفرح
أه يـــيـــمــه
""""" """""" """""" """"""

الله لا ينطي عـمر    بحرك بابچ من أمر
    ياللي ترفه شلون أجت ليج المنيه
يمه من هول الجره  انكطع باب المغفره
     الله ما يغـفـر ابـد للجـاهـليـه
شوصه وشكال النبي  هجم تالي الاجنبي
     ريت يمه الصار ريت يصـير بيـه
دفع يا يمه وشتم     بدفعته ضكني الألم
   وسقط محسن يمه هاي اكبر رزيه

يمه شفتي جم مصيبه.   من السقيفه
منه كلمن اخـذ حيـفه.   من السقيفه

الكسر ضلعچ ما ربح.   خذتي وياچ الفرح
           أه يــيـــمـــه
""""" """"" """""" """"" """"""

وياج كون اتوسـدت   يمـه أتمنـه مـتـت
   ليله ليله بالحزن خلصته عـمري
بالجسد سهله الجرح  للكلب شنهو اليصح
  انه جرحي بفكدچ او عايني صبري
والصبر ليل ونده    الشمس خاف اتبدده
 ويبقه طول العمر يمه دمعي يجري
يهون يا يمه الـسده.  لچـن فكد الوالـده
 اتحسه كطره من التعب بالكلب تسري

يمه حاجيني ارد اسمعچ.   ها يروحي
نايمـه ومـا بيه أكـعـدج.   ها يروحي

حزن كل عمري صبح    خذتي وياچ الفرح
            أه يـــيـــمـــه
""""" """"" """"" """"" """"""
يمه لو مرني المسه   موقف وما ينسه
  مصاب محسن اذكر ابعيني نظرته
شفته طايح عالترب  ابطيحته طاح الكلب
   بدمعتي يا يمه ناغيته وحـضـنتـه
صحت يا يمه وطحت  شكثر ونيت ونحت
     يمه جبرائيل يمچ يبـجي شفته
الصبح ريته ما طلع  عالارض محسن وكع
    الكون يهتز بـمصابچ من صدمته

اوداعچ بهايـه الـرزيه  عليه صعبه
ابقه اذكرچ كل مسيـه عليه صعبه

بيچ أمر الله وضح   خذتي وياچ الفرح
           أه يـــيـــمــه

""""""   """"""  ""''''""" """"""
نبچي انه والحسن   حسينچ دموعه جرن
     شكثر ونـينه على فكدچ يالحبيبه
بينه تدرين شجره    حسين كطعوا منحره
     عكبچ وعكب الأبو هسـه غريبه
منه كطعوا خنصره   اموسد وفوك الثره
    امخضب وعطشان ضل جثه سليبه
يمه كون بكـربـلـه   شفتي لحظة مقتله
    حتى عرش الله سمعناه بنحيبه

الزمن من لحظة غيابچ.    ما رحمنه
شسوه من عملته لبابچ.   ما رحمنه

الحزن معناه اتضح.   خذتي وياج الفرح
         أه يـــيـــمـــه
""""" """"" """"" """""" """""""


الشاعــر الاستاذ
أمــجـد الزيادي