راحوا أحباب الـيه طال الغياب عليه | الشاعر امجد الزيادي

راحوا أحباب  الـيه
طال الغياب   عليه
عني راحوا كل هلي     هسه وحدي بلا ولي
            طال الغياب   عليه
🔹🔹🔹🔹🔹🔹🔹
ودعـونـي لكربـلـه      ومشـت كل الـعايله
حال المفارك هـلـه      حـسـره حـسـره
همي ما يحمله جبل    اتمنه هسه ويه الأهل
كتله بويه وما قبـل     شـكــد اذكـــره

الصار ما صار      جفوني
والكـلـب نـار     نسوني

الكال اليه ادللي     هسه وحدي بلا ولي
🔹🔹🔹🔹🔹🔹🔹
شحالي هسه بغيبته      امعلله من فركته
أنه اطيب بـشـوفـته      وانـسـه همـي
طـول عليـه الـسفر      أه يـا ليـل الـقهر
عذب اعـضاي الـدهر     ريـتـه يـمـــي

فدوه يا ليل     أنشده
يهدم الحـيل    فـكـده

الكال يرجعلي علي     هسه وحدي بلا ولي
🔹🔹🔹🔹🔹🔹🔹
عكبه يخنكي النفـس       اهموم دلالي انترس
الكلب بجروحه همس       مـالـه رجـعـه
كتله أخذني ويه الضعن    يا وطن أنته الوطن
زغيره ما أحمل مـحن      واجـري دمـعه

يخنك الـروح     عـتابك
امتلي جروح    بغيابـك

ما أليك جيه الي      هسه وحدي بلا ولي
🔹🔹🔹🔹🔹🔹🔹
تدري كل شهكه أجـر      تنقص  أيام العمر
هذا حال البل الهـجـر      صـعـبـه صـعـبه
البيت وحشه من رحت  الوكت ما يمشي الوكت
دمعي بس عالخد يكت    وحيل غربه

أشرب الماي     أذكره
باقـي ويـاي     عطره

صوت كلبي يعتلي      هسه وحدي بلا ولي
🔹🔹🔹🔹🔹🔹🔹
العدها أبو مثلك شهم    العدها عم ليث الزلم
أبد ما تشوف الهضـم    ولا عـذابـه
هسه أضل واي دمعتي   منو اليدري بحالتي
ضلمـت كـل دنـيـتـي    مـن غـيابه

اشبع أهات    بسفرهم
بيه حسرات   انتضرهم

روحي ممليه ملي      هسه وحدي بلا ولي
🔸🔸🔸🔸🔸🔸🔸
راح أودي  بالهوه     روحي وكليبي سوه
بلكي ينضر للـضوه    يشوف حاله
حسين أبوي شأخره   صـدك طايـح عالثره
أبن حذلـم مخـبـره       على الجـرالـه

صدك مذبوح     حبيبي
بنته وتـنـوح     بنحيبي

عكبه شنهو ضل الي     هسه وحدي بلا ولي